I år har eg bestemt meg for at eg skal ha ei "light" jul - eg skal ikkje stresse -og alt eg gjer skal eg gjere av rein lyst. Eg har nok vore litt i overkant "julete" før om åra, men eg har alltid kosa meg med juleførebuingane. No har det seg slik at helsa ikkje er slik ho ein gong var og sjølv enkle ting krev meir av meg. Då er det fint å ha ein sambuar som ikkje er van med overdådig jul og meiner at det ikkje gjer nokon verdens ting om jula blir enkel.
Så her sit eg altso på solsnudagen og kjenner på meg at eg har full kontroll på mi enkle jul.
Julebaksten i år har blitt kransekakepinnar av ferdig kransekakemasse frå Askomat og så desse artige pepparkakene ala Vibeke.
Deiga var superenkel å lage og etter at ho hadde fått kjøla seg godt var det enkelt å høvle kakene med ostehøvel. Til å vere første gangen eg laga desse vart dei ganske god - men eg veit at eg skal ha meg ein diskusjon med Vibeke etter jul - berre for å prøve å finne ut kva ho gjer som ikkje eg har gjort....
Her i huset har vi bestemt oss for at vi ikkje vil ha juletre inne - vi har istaden satt opp eit flott tre med over 200 lys på verandaen...og det er kanskje ikkje så dumt med tanke på alle "husdyra" som vistnok bor i juletrea....
Men adventslysa har eg fått opp - dei stod jo fint på rekke og rad på loftet så det var jo berre å plugge i. Og med helga`s snøstorm har naturen ordna snøen på vindauga - det enkle er ofte det beste.
Nokre juleblomar er også kjekt å ha - har kjøpt meg nokre julestjerner og eit par amaryllis. Julestjernene håpar eg overlever til 2.dag jul og amaryllisane er i ferd med å opne seg - så når eg leitar fram eit par raude dukar, raude stearinlys og nokre nissar - ja så er stova julepynta.
Fekk ein ide om ei enkel lykt til å ha lys i ein eller annan stad på nettet for ei tid tilbake. Tenkte at det måtte jo vere idiellt her på desse kantar - her som det har vore under 10 minus i aldri så lang tid. Sette ut ei bytte med vatn i går kveld og i dag morgon var lykta ferdig...Enkelt og greit og så dekorativt:-))
Saman med nissen er lykta perfekt å ha på trappa. Tenkjer at eg skal lage ei til å ha på grava til mor og far Haugsbakken - ei islykt og ein heimelaga krans av furu teke frå hagen dei hadde rundt seg....
Julematen her i huset blir av praktiske årsaker ribbe, medisterkaker og surkål - Bjørn Erik sin julemat. Pinnekjøtet som eg er van med tek vi ein annan dag - vi klarar uansett ikkje ete to middagar kvar....
Denne jula vert antageleg heilt annleis enn det eg er van med - og akkurat det syns eg er spennande. Kjenner på meg at eg enno ikkje er for gammal til endringar og så veit eg at endringar kan vere veldig positive. Og er vi rett så heldige så får vi ein julegjest frå Hedmarken innom døra her - ja velkomen skal han vere iallefall.
